Duke ju referuar shkrimeve të publikuara në të përditshmen “Tribuna” të datës 5 dhe 6 gusht të këtij viti me tiullin “Policët flenë në detyrë” dhe “Policia nis hetimet e brendshme”, Inspektorati Policor i Kosovës dëshiron të sqaroj për opinionin publik lidhur me një keqkuptim të gazetarit Jeton Musliu gjatë interpretimit të shifrave nga raporti i inspektimit të jashtëzakonshëm.
Shkrimi në të përditshmen Tribuna, i publikuar në faqen 10 përmend shifrën prej 2960 policëve që sipas shkrimit “duhet të jenë në detyrë natën” e në fakt kjo shifër është numri i përgjithshëm i zyrtarëve policorë që punojnë në tri ndërrime në nivelin e stacioneve policore të Policisë së Kosovës e jo vetëm në ndërrimin e natës siç është e cekur në këtë të përditshme.
Inspektorati Policor i Kosovës si agjenci ekzekutive mbikëqyrëse për Policinë e Kosovës, i garanton qytetarët e Republikës së Kosovës se në vazhdimësi do të luftojë dukuritë negativë në Policinë e Kosovës duke ndikuar në ngritjen e performancës dhe profesionalizmit tek ta e në këtë mënyrë duke rritur edhe nivelin e besueshmërisë të qytetarëve për këtë institucion të rëndësishëm për sigurinë e vendit.