Zyrtarët e IPK-së shkëmbejnë përvojat me kolegët nga Inspektorati i Përgjithshëm i Forcave të Sigurisë (GIBS) në Çeki

Një delegacion prej tre zyrtarëve të  Inspektoratit Policor të Kosovës ka realizuar një vizitë dy ditore dhe takim në Inspektoratin e Përgjithshëm të Forcave të Sigurisë (GIBS) në Republikën e Çekisë.

Kjo vizitë u mundësua nga EPAC/EACN  (Partnerët Evropian Kundër Korrupsionit) si pjesë e projektit për shkëmbimin e praktikave më të mira anti-korrupsion (BACPE) dhe konsiderohet si një hap i rëndësishëm në përpjekjet për të fuqizuar kapacitetet institucionale dhe për të shkëmbyer njohuri dhe përvoja në luftën kundër korrupsionit.

Qëllimi i vizitës ishte të mundësojë shkëmbimin e praktikave më të mira dhe të thellojë bashkëpunimin ndërkombëtar mes agjencive mbikëqyrëse policore. Delegacioni u angazhua në diskutime me kolegët e GIBS-it lidhur me strategjitë efektive në ndërgjegjësimin kundër korrupsionit, parandalimin  e korrupsionit, mbrojtjen e sinjalizuesve,  menaxhimin e rreziqeve nga korrupsioni etj.

Pjesëmarrësit e delegacionit kishin mundësinë të takonin ekspertë nga GIBS dhe të ndanin përvoja mbi metodat dhe praktikat më të mira që përdoren në Çeki. Kjo vizitë është pjesë e një projekti më të gjerë që synon të ofrojë mundësi për agjencitë anëtare të EPAC/EACN për të mësuar nga njëra-tjetra dhe për të zbatuar praktika efektive në luftën kundër korrupsionit dhe mashtrimit.

Gjatë realizimit të kësaj vizite delegacioni i IPK-së mori pjesë edhe në ceremoninë e shënimit të 17 vjetorit të Pavarësisë së Kosovës të organizuar nga Ambasada e Republikës së Kosovës në Pragë dhe falënderon stafin e Ambasadës për përkrahjen e dhënë në realizimin me sukses të kësaj vizite.