Në Raportin për Kosovën, të publikuar më 4 nëntor 2026, Komisioni Evropian ka vlerësuar si të një cilësie të lartë hetimet e zhvilluara nga Inspektorati Policor i Kosovës (IPK), në kuadër të trajtimit të përgjegjësive që lidhen me fushëveprimin e Ministrisë së Punëve të Brendshme.

Ky vlerësim përbën një konfirmim të rëndësishëm të profesionalizmit, integritetit dhe cilësisë së punës hetimore të IPK-së, si dhe të rolit që ka në fuqizimin e llogaridhënies dhe sundimit të ligjit.

Raporti gjithashtu ka trajtuar nevojën për përmirësimin e mëtejshëm të sistemit për menaxhimin e rasteve, proces ky që pritet të realizohet me përkrahjen e projektit HAPE, brenda një afati të arsyeshëm kohor.

 

Prishtinë/Gjakovë, 13 tetor 2026 – Inspektorati Policor i Kosovës (IPK), me mbështetjen e Misionit të OSBE-së në Kosovë, ka përmbyllur me sukses punëtorinë rajonale të dedikuar forcimit të integritetit profesional, rritjes së llogaridhënies institucionale dhe avancimit të standardeve profesionale në Policinë e Kosovës.
Punëtoria një ditore e zhvilluar dje në Gjakovë, mblodhi mbi 20 zyrtarë dhe menaxherë policorë nga njësi të ndryshme të stacioneve policore dhe Drejtorisë Rajonale të Policisë në Gjakovë. Në aktivitet morën pjesë dhe kontribuuan gjithashtu përfaqësues të Drejtorisë për Hetime të Brendshme të Policisë së Kosovës.
Gjatë punëtorisë u trajtuan një sërë çështjesh me rëndësi për ushtrimin profesional të detyrave policore, me fokus të veçantë në integritetin profesional dhe respektimin e të drejtave të njeriut, menaxhimin dhe mbrojtjen e konfidencialitetit të informacionit, si dhe komunikimin me qytetarët dhe ndikimin e tij në besimit e publikut në institucionet e zbatimit të ligjit.
Diskutimet dhe shkëmbimi i përvojave ndërmjet pjesëmarrësve synuan të kontribuojnë në identifikimin e praktikave të mira dhe në fuqizimin e përgjegjësisë profesionale e institucionale, duke promovuar standarde të qëndrueshme të integritetit dhe llogaridhënies në Policinë e Kosovës.
Inspektorati Policor i Kosovës shpreh mirënjohjen për Misionin e OSBE-së në Kosovë për mbështetjen dhe bashkëpunimin e vazhdueshëm në realizimin e aktiviteteve që synojnë fuqizimin e kapaciteteve institucionale dhe promovimin e standardeve profesionale në fushën e zbatimit të ligjit.