Prishtinë- Hajvali, 30 qershor2026,
Në kuadër të aktiviteteve të organizuara me rastin e shënimit të 20-vjetorit të themelimit të Inspektoratit Policor të Kosovës (IPK), zyrtarët e IPK-së sot kanë realizuar një aksion vullnetar për dhurimin e gjakut, në bashkëpunim me Qendrën Kombëtare të Kosovës për Transfuzionin e Gjakut.
Kësaj nisme humanitare iu përgjigjën një numër i madh i zyrtarëve të IPK-së të cilët me këtë rast kontribuuan në sigurimin e rezervave të gjakut për qytetarët në nevojë.
Ky aktivitet është pjesë e agjendës së aktiviteteve të Javës së IPK-së, e cila organizohet në shenjë të dy dekadave të punës së institucionit në përmbushjen e mandatit ligjor me fokus në promovimin e integritetit, përgjegjësisë, llogaridhënies dhe shërbimit ndaj qytetarëve.
Përmes këtij aktiviteti, zyrtarët e IPK-së dëshmuan se përkushtimi i tyre  nuk kufizohet vetëm në detyrat profesionale, por shtrihet edhe në veprime humanitare për qytetarët në nevojë.
Inspektorati Policor i Kosovës shpreh mirënjohjen dhe falënderimin e veçantë për të gjithë zyrtarët e IPK-së që iu përgjigjën thirrjes për dhurimin e gjakut dhe stafin profesional të Qendrës Kombëtare të Transfuzionit të Gjakut për bashkëpunimin dhe angazhimin e tyre në realizimin me sukses të këtij aktiviteti humanitar.

Inspektorati Policor i Kosovës (IPK) në prag të shënimit të 20 vjetorit të themelimit, mirëpriti në një vizitë  nxënësit e klasave 8/2 dhe 8/3 të Shkollës fillore të mesme të ulët “Shkendije” të shoqëruar nga kujdestaret e klasave, znj. Nazmije Pacolli dhe znj. Albulena Bruqi-Nimani.
Gjatë vizitës, nxënësit u pritën nga Kryeshefi Ekzekutiv i IPK-së, z. Kushtrim Hodaj, si dhe zyrtarë të tjerë të IPK-së  të cilët prezantuan para tyre rolin, mandatin dhe përgjegjësitë e Inspektoratit Policor të Kosovës në mbikëqyrjen e ligjshmërisë, profesionalizmit dhe llogaridhënies në Policinë e Kosovës.
Përmes prezantimeve dhe bashkëbisedimit interaktiv, nxënësit patën mundësinë të njihen më nga afër me funksionimin e IPK-së, procedurat e trajtimit të ankesave dhe raportimeve nga qytetarët, si dhe rëndësinë e institucioneve të pavarura në forcimin e sundimit të ligjit dhe mbrojtjen e të drejtave të qytetarëve.
Gjatë takimit, nxënësit shprehën interesim të madh për punën e institucionit, duke parashtruar pyetje të ndryshme dhe duke zhvilluar diskutime konstruktive me përfaqësuesit e IPK-së.
Inspektorati Policor i Kosovës vlerëson vizita të tilla edukative si një mundësi të rëndësishme për të afruar institucionet me të rinjtë, për të promovuar transparencën institucionale dhe për të kontribuar në edukimin qytetar të gjeneratave të reja.
IPK falënderon nxënësit dhe stafin arsimor për vizitën dhe interesimin e treguar, duke mbetur i përkushtuar për bashkëpunim me institucionet arsimore në funksion të informimit dhe ndërgjegjësimit të qytetarëve të rinj mbi rolin e institucioneve në një shoqëri demokratike.

Prishtinë/Prizren, 16 qershor 2026
Hetuesit e IPK-së ditë më parë kanë filluar të ndërmarrin  veprime fillestare hetimore lidhur me veprimet/reagimet policore ku dyshohet se janë përfshirë tre zyrtarë policorë.
Pas këtyre veprimeve, IPK i ka rekomanduar Policisë së Kosovës suspendimin nga detyra të tre zyrtarëve policorë të  Stacionit Policor Alfa në Prizren .
Zyrtarët policorë kanë ndaluar automjete të paregjistruara dhe motoçikleta që qarkullonin në kundërshtim me dispozitat ligjore, duke iniciuar fillimisht procedurat përkatëse policore,.
 Sipas gjetjeve fillestare të hetimit, dyshohet se zyrtarët policorë nuk kanë vepruar në përputhje me obligimet e tyre ligjore dhe zyrtare, duke mos vazhduar me procedurat e parapara dhe duke lejuar personat/kundërvajtësit të largohen pa i ndërmarrë masat përkatëse ligjore.
Ky rekomandim për suspendim është bërë me dyshimin se të njëjtit më 11.06.2026 në Prizren  me dyshimin se veprimet e tyre përbëjnë elemente të veprës penale “marrje e ryshfetit”, e sanksionuar sipas Kodit Penal të Republikës së Kosovës.
Hetimet lidhur me këtë rast janë duke u zhvilluar nga Departamenti i Hetimeve në IPK, në bashkëpunim me Prokurorinë Themelore me qëllim të sqarimit të plotë të të gjitha rrethanave dhe veprimeve të zyrtarëve policorë të përfshirë.
Rekomandimi për suspendim të përkohshëm të zyrtarëve policorë është ndërmarrë me qëllim të mos-ndikimit në procesin hetimor dhe garantimit të pavarësisë dhe paanshmërisë së hetimeve.

Kryeshefi Ekzekutiv i IPK-së z. Kushtrim Hodaj ka pritur sot në vizitë z. Albin Kurti, Kryeministër i Republikës së Kosovës, si dhe z. Xhelal Sveçla, Ministër i Punëve të Brendshme. 

Kryeshefit Ekzekutiv të IPK-së, z. Kushtrim Hodaj, i njoftoj nga afër me të arriturat e Inspektoratit Policor të Kosovës, aktivitetet dhe prioritetet institucionale, si dhe u diskutua lidhur me sfidat me të cilat ballafaqohet IPK-ja në ushtrimin e mandatit të saj ligjor. 

Kryeministri Kurti vlerësoj lartë misionin dhe punën e IPK duke theksuar se “Është nder të jem sot këtu, në një institucion me rëndësi të veçantë për shtetin e së drejtës dhe në themel të besimit publik në Republikën e Kosovës. Është mekanizmi që siguron se ligji zbatohet brenda vetë sistemit të sigurisë dhe se askush nuk është mbi ligjin, pa përjashtim dhe pa privilegje. Mandati i tij është i qartë dhe i pa kompromis: hetim, inspektim, disiplinë dhe referim i çdo rasti ku cenohet integriteti i Policisë së Kosovës. Ky është një rol thelbësor për funksionimin e shtetit të së drejtës. Që nga fillimi i mandatit, për ne ka qenë qenësore forcimi i integritetit të institucioneve. Rezultatet e punës së IPK-së në vitet e fundit flasin qartë: IPK ka rritur ndjeshëm efikasitetin në trajtimin e ankesave të qytetarëve, duke u shndërruar në një adresë të besueshme institucionale për çdo shqetësim ndaj veprimeve të Policisë”. 
 

Gjithashtu edhe Ministri i Punëve të Brenshme z. Xhelal Sfeçla vlerësoj lartë rolin dhe angazhimin e IPK-së duke u zotuar për mbështetj në ngritjen e kapaciteteve të IPK,  përfshirë shtimin të burimeve njerëzore, projekteve të digjitalizmit si dhe fuqizim dhe zgjerim të mandatit ligjor. 

Në pjesën e dytë të vizitës, në prani të menaxhmentit të IPK-së, Kryeministrit të Republikës së Kosovës dhe Ministrit të Punëve të Brendshme iu prezantua projekti “Platforma elektronike për vlerësimin e performancës së Stacioneve Policore”. 

Inspektorati Policor i Kosovës ka filluar muaj më herët një proces inspektimi, pas të cilit përmes një platforme digjitale në ueb-faqen zyrtare të IPK-së do të pasqyrohen rezultatet e vlerësimit të performancës së stacioneve policore. Këto vlerësime realizohen përmes inspektimit të strukturave dhe funksioneve policore, me fokus në aktivitetet kryesore operative dhe administrative të tyre. 

 

Platforma elektronike për vlerësimin e performancës së stacioneve policore paraqet një mekanizëm të rëndësishëm për fuqizimin e mbikëqyrjes policore dhe rritjen e nivelit të llogaridhënies institucionale. Përmes publikimit të rezultateve të vlerësimit, kjo platformë synon të rrisë transparencën ndaj publikut dhe të krijojë standarde më të avancuara të monitorimit të punës policore, në përputhje me praktikat bashkëkohore të policiimit demokratik. 

Po ashtu, rezultatet e nxjerra nga ky proces vlerësimi pritet të kontribuojnë drejtpërdrejt në identifikimin e fushave që kërkojnë përmirësim, avancimin e kapaciteteve profesionale dhe rritjen e efikasitetit operacional të stacioneve policore. Përmes promovimit të performancës më të lartë policore dhe rritjes së përgjegjshmërisë institucionale, kjo platformë pritet të ketë ndikim pozitiv edhe në forcimin e sigurisë publike dhe besimit të qytetarëve ndaj institucioneve të zbatimit të ligjit.

Komunikatë për media
Ferizaj-Pejë, 25 maj  2026
Inspektorati Policor i Kosovës (IPK), me përkrahjen e Misionit të OSBE-së në Kosovë, ka përmbyllur me sukses edhe dy punëtori rajonale të organizuara në kuadër të aktiviteteve për fuqizimin e integritetit profesional, rritjen e llogaridhënies institucionale dhe avancimin e standardeve të punës në Policinë e Kosovës.
Punëtoritë janë mbajtur në Ferizaj dhe në Pejë, duke mbledhur në secilën prej tyre mbi 25 zyrtarë/menaxherë policorë nga njësi të ndryshme të stacioneve policore dhe Drejtorive Rajonale Policore. Në këto aktivitete morën pjesë dhe kontribuuan gjithashtu përfaqësues nga Drejtoria për Hetime të Brendshme në kuadër të Policisë së Kosovës . 
Gjatë punëtorive u trajtuan tema të rëndësishme që lidhen drejtpërdrejt me performancën profesionale dhe etikën në punë, përfshirë integritetin profesional në raport me të drejtat e njeriut, menaxhimin e konfidencialitetit të informatave, si dhe komunikimin me qytetarët dhe ndikimin e tij në rritjen e besueshmërisë ndaj policisë.
Diskutimet ndërvepruese dhe shkëmbimi i përvojave ndërmjet pjesëmarrësve rezultuan në disa konkluzione që ndërlidhen me nevojën për forcimin e vazhdueshëm të kulturës së integritetit brenda strukturave policore, rolin e komunikimit profesional dhe transparent me qytetarët në ndërtimin dhe ruajtjen e besimit publik ndaj Policisë së Kosovës etj.
Këto punëtori janë pjesë e një cikli prej së paku tetë aktivitetesh të planifikuara për t’u realizuar në të gjitha Drejtoritë Rajonale Policore në Republikën e Kosovës, me qëllim të krijimit të një qasjeje të unifikuar dhe gjithëpërfshirëse në ngritjen e kapaciteteve profesionale dhe fuqizimin e integritetit institucional.
IPK falënderon Misionin e OSBE-së për përkrahje duke mbetur e përkushtuar në mbështetjen dhe organizimin  e aktiviteteve që kontribuojnë drejt një policie profesionale, transparente dhe të besueshme për qytetarët e Republikës së Kosovës