Raporti i inspektimit adreson përveç tjerash përmes rekomandimeve dobësitë në fushën e organizimit dhe burimeve njerëzore dhe ato në fushën e aktivitetit operativ hetimor te Stacionet Policore që kanë qenë subjekt i këtij inspektimi

Prishtinë/Hajvali, 19 Janar 2025 

Departamenti i Inspektimit në kuadër të Inspektoratit Policor të Kosovës (IPK) ka publikuar Raportin e inspektimit të rregullt në fushën “Trajtimi i dhunës në familje nga Policia e Kosovës”.

Inspektimi është realizuar në bazë të Planit Vjetor të Inspektimeve të Rregullta për vitin 2025. Inspektimi ka ofruar mundësi për t’u njohur me performancën e njësive patrulluese dhe atyre hetimore në trajtimin me sukses të veprave penale të kësaj natyre.
Objektivat e këtij inspektimi kanë qenë: vlerësimi i kapaciteteve policore për trajtimin e rasteve, vlerësimi i reagimit policor dhe hetimit të rasteve të dhunës në familje, vlerësimi i aktiviteteve policore në monitorimin e urdhrave mbrojtës, si dhe vlerësimi i përmbajtjes së dosjeve dhe evidencave.
Gjetjet e këtij inspektimi janë me interes për strukturën përkatëse policore, përfshirë nivelin drejtues dhe atë operativ. 
Në fushën e organizimit dhe burimeve njerëzore janë evidentuar dobësi që pasqyrojnë mos funksionalizimin e ekipeve të hetimeve të dhunës në familje në disa prej stacioneve, 
mos plotësimin e vendeve të punës në disa prej ekipeve të hetimeve të dhunës në familje etj. 
Në fushën e aktivitetit operativ hetimor janë evidentuar dobësi që pasqyrojnë se në disa prej dosjeve të inspektuara vërehen mungesë të raporteve njoftuese për Prokurorin mbi dyshimet e arsyeshme të kryerjes së veprave penale  si dhe mos aplikim të vlerësimit të rrezikut për viktimat sipas standardit në disa prej dosjeve të inspektuara. 

IPK në kuadër të Raportit ka dhënë gjashtë (6) rekomandime, që kanë të bëjnë me nevojën e funksionalizimit të plotë të ekipeve të hetimit të dhunës në familje, trajnimit të burimeve të angazhuara në këto njësi, ngritjen e cilësisë së intervistave, zgjerimin e intervistave edhe me dëshmitarë tjerë potencial, nxjerrjen e raporteve ditore mbi rastet, respektimin e zinxhirit të plotë komandues gjatë procedimit të kallëzimeve penale në Prokurorinë e Shtetit, etj.

Lidhur me rezultatin e inspektimit duke përfshirë edhe rekomandimet e dhëna, të gjithë të interesuarit mund të kenë qasje në Raportin e plotë të inspektimit, i cili është i publikuar në faqen zyrtare të IPK-së (shih linkun si në vijim):
https://ipk.rks-gov.net/Reports/InspectionReports

Ndaj ankuesit tani i dyshuar iniciohet rast  dhe hetim penal  me dyshimin për veprën penale “Lajmërim i rremë apo kallëzim i rremë”
 Prishtinë/Leposaviq, 16 janar 2026
Para mesnatës së datës 13 janar të këtij viti hetuesit e IPK-së janë njoftuar  nga Policia e Kosovës lidhur me një ankues i cili pretendonte se ishte keqtrajtuar nga zyrtarë të Policisë së Kosovës.
Incidenti raportohet të ketë ndodhur tek Ura e Bistricës në Leposaviq pak pas orës 22:00 të datës 13 janar 2026.
Sipas ankuesit, zyrtarë të Policisë së Kosovës e kishin ndaluar të njëjtin në një pikë kontrolli në këtë lokacion deri sa i njëjti ishte duke drejtuar një automjet të markës Audi A4 (me targa të Republikës së Serbisë) dhe se i njëjti kishte brenda veturës së tij edhe dy pasagjerë.
Pas pranimit të informacionit hetuesit e IPK-së bazuar në autorizimet ligjore kanë filluar menjëherë të ndërmarrin veprime hetimore në konsultim të vazhdueshëm dhe bashkëpunim me Prokurorinë e Shtetit – respektivisht Prokurorinë Themelore në Mitrovicë.
Në kuadër të veprimeve hetimore është intervistuar ankuesi në cilësinë dëshmitarit në prezencën e avokatit të tij mbrojtës ku i njëjti ka deklaruar se gjatë kontrollit nga zyrtarë të Policisë së Kosovës ishte keqtrajtuar dhe goditur nga zyrtarët policorë. I njëjti ka potencuar para hetuesve të IPK-së se si pasojë e këtij keqtrajtimi  kishte pësuar lëndime prapa në qafë, në bërrylin e majtë, në dorën e djathtë dhe në këmbë nga zyrtari policor i cili e kishte bërë kontrollin sipërfaqësor në trup dhe për këtë ka kërkuar trajtim mjekësor në Spitalin Rajonal në Mitrovicë - Veri. Sipas tij, njëri nga zyrtarët policor e ka goditur edhe shokun e tij me kondak të armës së gjatë në këmbë. 
Hetuesit e IPK-së në kuadër të veprimeve hetimore dhe të procesit të verifikimit të pretendimeve të ankuesit kanë siguruar prova duke përfshirë edhe video incizim nga kamerat e sigurisë që kanë mbuluar me pamje vendin ku është kryer ndalesa në pikën e kontrollit nga zyrtarët policorë.
Pas analizimit të provave dhe video-incizimeve është vërtetuar se të njëjtat nuk pasqyronin pretendimet e palës dhe se zyrtarët policorë me asnjë veprim nuk dyshohej se kishin tejkaluar autorizimet e tyre apo përdorur forcën.
Nga procesi i analizimit të video incizimeve hetuesit e IPK-së kanë vërejtur se  pretendimet e ankuesit janë të sajuara dhe të njëjtat i janë paraqitur prokurorit të Prokurorisë Themelore në Mitrovicë i cili ka kërkuar që ndaj ankuesit tani i dyshuar të  iniciohet rast  dhe hetim penal  me dyshimin për veprën penale “Lajmërim i rremë apo kallëzim i rremë.

Misioni i Inspektoratit Policor të Kosovës është që përmes ushtrimit të veprimtarisë së tij, të sigurojë një shërbim policor të përgjegjshëm, demokratik dhe transparent, në përputhje me legjislacionin në fuqi dhe standardet e kërkuara.
IPK gjatë vitit 2025 (deri më 26 dhjetor) ka pranuar dhe ka menaxhuar me 2480 ankesa. Prej tyre 1753 ankesa që janë klasifikuar si shkelje disiplinore dhe janë përcjellë për t’u trajtuar në Drejtorinë për hetime të brendshme dhe verifikim të së kaluarës në Policinë e Kosovës, 717 nga to janë përcjellë në Departamentin e Hetimeve në IPK më dyshimin për veprimtari penale (pjesa tjetër janë përcjellë në institucione tjera dhe në Departamentin e Inspektimeve).
Bazuar në trendët e pranimit të ankesave këtë vit IPK ka pranuar mbi 20% më shumë ankesa krahasuar me vitin e kaluar (2046 ankesa në vitin 2024) e që i referohet kryesisht disa faktorëve si: fuqizimit të besueshmërisë së qytetarëve në Inspektoratin Policor, transparencës së institucionit etj.
Inspektorati Policor i Kosovës (IPK) në kuadër të angazhimeve dhe fushëveprimit ligjor për fuqizimin e integritetit policor, për periudhën kohore janar – dhjetor (deri më 26 dhjetor) të vitit 2025 ka ndërmarrë këto masa dhe rekomandime:
ka arrestuar 47 të dyshuar (41 punonjës të PK-së dhe 6 qytetarë),
ka dhënë 129 rekomandime për suspendim,
ka dhënë 2 rekomandime për transfer,
në prokuroritë kompetente janë dorëzuar 110 Kallëzime Penale, 36 Raporte të Veçanta dhe 85 Raporte Informuese.
Gjatë këtij viti 5 veprat penale më të shpeshta që janë trajtuar/hetuar nga IPK-ja janë:
“Keqtrajtim gjatë ushtrimit të detyrës zyrtare ose autorizimeve publike”
“Keqpërdorimi i pozitës apo autoritetit zyrtar”
“ Rrezikim i trafikut publik”
“Lëndimi i lehtë trupor” dhe
“Kanosje”.
Përgjatë këtij viti IPK ka realizuar 12 inspektime prej të cilave 5 të rregullta dhe 7 të jashtëzakonshme . Nga këto inspektime, deri në këtë fazë janë dhënë 76 rekomandime për përmirësimin e performances policore.
Inspektimet janë si vijon:
Menaxhimi i punësimit dytësor në Stacionin Policor të Podujevës,
Menaxhimi i punësimit dytësor në Stacionin Policor të Mbikëqyrjes së Kufirit - Gjilan,
Reagimi në thirrjet e qytetarëve dhe raportimi i aktiviteteve policore,
Vlerësimi i performances së Stacionit Policor të Prizrenit,
Përdorimi i teknologjisë për matjen e shpejtësisë së lëvizjes së mjeteve në trafik,
Vlerësimi i performances së Stacionit Policor të Mitrovicës (Jugu),
Administrimi i automjeteve të sekuestruara,
Trajtimi i dhunës në familje nga Policia e Kosovës,
Ekzekutimi i urdhëresave të gjykatave,
Vlerësimi i aktiviteteve dhe masave për ngritjen e sigurisë në komunitet (Novo Bërdë),
Vlerësimi i trajtimit dhe procedimit të rasteve të trafikimit me narkotikë,
Menaxhimi i Qendrës së Ndalimit në Stacionin Policor të Podujevës.
Gjatë këtij viti, IPK-ja ka pasur disa aktivitete nën vazhdën e përpjekjeve për të ndërtuar marrëdhënie të qëndrueshme me qytetarë dhe partnerë të ndryshëm, me organizata qeveritare e jo qeveritare dhe me media.
IPK ka vazhduar angazhimet dhe aktivitetet në kuadër të bashkëpunimit vendor, rajonal e ndërkombëtar duke vlerësuar lartë bashkëpunimin dhe përkrahjen institucionale nga Ministria e Punëve të Brendshme,  Prokuroria e Shtetit, dhe agjencitë tjera.
Me agjencitë homologe të rajonit ka pasur një bashkëpunim të shtuar  si dhe në angazhimet në kuadër të Forumit Rajonal të Agjencive Mbikëqyrëse Policore.
IPK vazhdon të jetë aktive në Partneritetin Evropian Kundër Korrupsionit (EPAC), si mekanizëm i Këshillit të Evropës, përmes përfaqësimit në konferenca, punëtori dhe vizita studimore si dhe pjesëmarrjes në  konferencën vjetore të realizuar këtë vit në SHBA në Shoqatën Kombëtare të Hetimeve të Brendshme (NIAIA).
Edhe këtë vit IPK ka vazhduar të mbështetet nga partnerët ndërkombëtar si ICITAP, OSBE, EULEX, HAPE të cilët kanë kontribuuar në ngritjen dhe fuqizimin e kapaciteteve profesionale përmes programeve të trajnimeve dhe mbështetjes logjistike.
 IPK falënderon të gjithë qytetarët për bashkëpunim me zotimin se do të vazhdojmë të mbesim  të  përkushtuar në adresimin e shqetësimeve të qytetarëve, në misionin e përbashkët për të zhvilluar një shërbim policor me integritet të lartë profesional dhe me standarde evropiane.
Të dhënat tjera shtesë dhe më në detaje do të bëhen publike në raportin vjetor të IPK-së për vitin 2025.